तिलोत्तमामा राष्ट्रिय औद्योगिक व्यापार मेला सुरु, लगानीमैत्री वातावरण निर्माणमा जोड
बुटवल,कार्तिक ३
रुपन्देहीको तिलोत्तमामा नवौँ राष्ट्रिय औद्योगिक व्यापार मेला, कृषि, प्रविधि एवम् पर्यटन प्रवद्र्धन महोत्सव सुरु भएको छ। तिलोत्तमा उद्योग वाणिज्य संघको आयोजनामा मणिग्राममा बिहीबारदेखि सुरु भएको मेलाको तिलोत्तमा नगरपालिकाका प्रमुख रामकृष्ण खाणले दीप प्रज्ज्वलन गरी उद्घाटन गर्नुभएको हो।मेलाको उद्घाटन गर्दै नगरप्रमुख खाणले निजी क्षेत्रको विकासबिना मुलुकको अर्थतन्त्रमा सुधार आउन नसक्ने बताउनुभयो। उदार अर्थतन्त्र अवलम्बन गरेपछि गरिबी घट्नुका साथै उद्योग, व्यापार तथा व्यवसायमा क्रमिक विकास भएको उल्लेख गर्दै उहाँले अब आयात प्रतिस्थापन र निर्यात प्रवद्र्धनलाई प्राथमिकता दिनुपर्ने बताउनुभयो।
औद्योगिक तथा व्यावसायिक विकासका लागि तीनै तहका सरकारले गम्भीरतापूर्वक काम गर्नुपर्ने उहाँको भनाइ थियो। तिलोत्तमामा स्थायी प्रदर्शनीस्थल निर्माणका लागि जग्गाको अभाव रहेको उल्लेख गर्दै उहाँले तिलोत्तमा नगरपालिका–४ स्थित तिलोत्तमा नदी उकास क्षेत्रमा पाँच बिघा जग्गा व्यवस्थापन गर्ने प्रतिबद्धता जनाउनुभयो। मेलाले स्थानीय उद्योग तथा व्यापारको प्रवद्र्धनसँगै आर्थिक गतिविधि चलायमान बनाउन सहयोग पुग्ने उहाँले विश्वास व्यक्त गर्नुभयो।
त्यस्तै, बुटवल उपमहानगरपालिकाका प्रमुख खेलराज पाण्डेले बुटवलदेखि कोरला नाकासम्मका पहाडी क्षेत्रका कृषिजन्य तथा मासुजन्य उत्पादन तराईमा ल्याउने र तराईका उत्पादन पहाडी क्षेत्रमा पु¥याउने व्यवस्था मिलाउन सके औद्योगिक तथा व्यावसायिक विकासमा टेवा पुग्ने बताउनुभयो।उहाँले मोतीपुर औद्योगिक क्षेत्र निर्माणको कामलाई तीव्रता दिनुपर्नेमा जोड दिँदै त्यसले बुटवल र तिलोत्तमासहित समग्र रुपन्देही तथा मुलुककै औद्योगिक विकास र अर्थतन्त्र सुधारमा योगदान पु¥याउने बताउनुभयो।
संघका अध्यक्ष तथा मेला मूल आयोजक समितिका संयोजक ज्ञानेन्द्र कार्कीले स्थानीय उत्पादनलाई बजारसँग जोड्दै औद्योगिक तथा व्यावसायिक गतिविधि चलायमान बनाउन मेला आयोजना गरिएको बताउनुभयो। उद्योग, व्यापार, कृषि, पर्यटन र प्रविधिको साझा प्रदर्शनीका रूपमा मेलालाई विकास गर्ने लक्ष्य रहेको उहाँले उल्लेख गर्नुभयो।अध्यक्ष कार्कीले भारतसँगको व्यावसायिक सम्पर्कलाई प्रभावकारी बनाउँदै व्यापारिक लाभ लिन सकिने बताउँदै बुद्ध सर्किट र जानकी सर्किटको विकास तथा विस्तारलाई पनि मेलाले प्राथमिकता दिएको जानकारी दिनुभयो।
नेपाल उद्योग वाणिज्य महासंघ र लुम्बिनी प्रदेश उद्योग वाणिज्य महासंघको संरक्षकत्व, वन, वातावरण तथा पर्यटन मन्त्रालय लुम्बिनी प्रदेशको प्रवद्र्धन तथा तिलोत्तमा नगरपालिका, रुपन्देही चेम्बर अफ कमर्स र तिलोत्तमा उद्योग व्यापार संगठनको सहआयोजनामा मेला सञ्चालन भएको हो। तिलोत्तमामा आयोजना भएको यो नवौँ मेला भए पनि तिलोत्तमा उद्योग वाणिज्य संघको आयोजनामा भएको चौथो औद्योगिक व्यापार मेला हो।‘उद्योग, कृषि, प्रविधि र पर्यटनमा लगानी ः दिगो आर्थिक विकासका लागि चौथो तिलोत्तमा राष्ट्रिय प्रदर्शनी’ भन्ने नारासहित आयोजित मेलामा करिब ३२५ स्टल रहेका छन्। १४ दिनसम्म सञ्चालन हुने मेलामा पाँच लाख दर्शकले अवलोकन गर्ने र १२ करोड रुपैयाँ बराबरको आर्थिक कारोबार हुने आयोजकको अनुमान छ।
मेलामा औद्योगिक उत्पादन, कृषि उपज, प्रविधि तथा पर्यटनसँग सम्बन्धित सामग्री र सेवाको प्रदर्शनी तथा बिक्री गरिनेछ। संघका वरिष्ठ उपाध्यक्ष तथा मेला मूल आयोजक समितिका सहसंयोजक सुरज पंगेनीका अनुसार कृषि तथा पर्यटन प्रवद्र्धनलाई प्राथमिकता दिँदै विभिन्न क्षेत्रका उत्पादन र गतिविधि समेटिएका छन्।मेलालाई व्यापारिक प्रदर्शनीमा मात्र सीमित नराखी मनोरञ्जन, संस्कृति र पर्यटनसँग पनि जोडिएको छ। संघका महासचिव तथा मेला प्रवक्ता राजकुमार पाण्डेका अनुसार ८० फिट अग्लो वाटरफल, चरखे पिङ, ३६० डिग्री झुला र जिरो ग्राभिटी झुला मेलाका प्रमुख आकर्षण रहेका छन्।
त्यसैगरी, मेलामा पशुपतिनाथ मन्दिर, लुम्बिनी, मुक्तिनाथ र जनकपुरधामको कलात्मक शैलीमा तयार गरिएका संरचना, रामायण शो, तिलोत्तमा आरती, सांस्कृतिक कार्यक्रम तथा बालउद्यान राखिएका छन्। तिलोत्तमाभित्रका पर्यटकीय गन्तव्यको पहिचान र प्रचारप्रसारका लागि पर्यटन ग्यालरीसमेत राखिएको छ।
मेलामार्फत उद्यमशीलता, श्रम र वातावरणीय सचेतना अभिवृद्धिका कार्यक्रम पनि सञ्चालन गरिने आयोजकले जनाएको छ। जलवायु परिवर्तनका असरबारे जनचेतनामूलक कार्यक्रम, विद्यार्थीलाई उद्यमशीलताप्रति प्रेरित गर्ने गतिविधि, सफल उद्यमीका अनुभव तथा प्रेरणादायी मन्तव्य र विभिन्न व्यावसायिक विषयमा प्यानल छलफल आयोजना गरिनेछ। उद्योगी, व्यवसायी र श्रमिकबीचको सम्बन्धलाई थप व्यवस्थित बनाउन श्रम डेस्क स्थापना तथा श्रम अडिट कार्यक्रमसमेत राखिएको छ।
मेलामा प्रवेशका लागि सर्वसाधारणलाई एक सय रुपैयाँ टिकटको व्यवस्था गरिएको छ। ज्येष्ठ नागरिक र अपाङ्गता भएका व्यक्तिलाई निःशुल्क प्रवेशको व्यवस्था मिलाइएको आयोजकले जनाएको छ। विशेष समयका लागि विशेष टिकटको व्यवस्थासमेत गरिएको छ।
उद्घाटन कार्यक्रममा नेपाल उद्योग वाणिज्य महासंघका उपाध्यक्ष कृष्णप्रसाद शर्माले मुलुकको औद्योगिक तथा व्यावसायिक वातावरण कमजोर हुँदै गएको उल्लेख गर्दै त्यसको सुधारका लागि सरकार र निजी क्षेत्रबीच सहकार्य आवश्यक रहेको बताउनुभयो। बिग्रँदो अर्थतन्त्र सुधार गर्न दुवै पक्षले साझा प्रयास गर्नुपर्ने उहाँको भनाइ थियो।
कार्यक्रममा अनुगमन तथा मूल्यांकन समितिका संयोजक गुणनिधि (माधव) भण्डारी, सिद्धार्थनगर उद्योग वाणिज्य संघ भैरहवाका अध्यक्ष ठाकुरकुमार श्रेष्ठ, रुपन्देहीका प्रमुख जिल्ला अधिकारी विश्वप्रकाश अर्याल, तिलोत्तमा चेम्बर अफ कमर्सका अध्यक्ष नेत्र न्यौपाने, तिलोत्तमा उद्योग व्यापार संगठनका अध्यक्ष प्रेम जीएमलगायत उद्योगी तथा व्यवसायीले मेलाको सफलताको शुभकामना व्यक्त गर्नुभएको थियो।
मेलाको प्रचारप्रसारका लागि प्रभातफेरी
यसैबीच, मेलाको प्रचारप्रसारका लागि बिहीबार प्रभातफेरी आयोजना गरिएको थियो। मेला स्थलबाट सुरु भएको प्रभातफेरी नगरका विभिन्न स्थानको परिक्रमा गरी पुनः मेला स्थलमै पुगेर सम्पन्न भएको थियो।प्रभातफेरीमा उत्कृष्ट हुने समूहलाई नगद पुरस्कारसहित सम्मान गरिएको छ। प्रभातफेरीमा नेपाल मगर संघ तिलोत्तमा–१ प्रथम, क्षेत्री समाज नेपाल द्वितीय तथा नेपाल मगर संघ तिलोत्तमा नगर समिति र क्रिस्टल नलेज एकेडेमी मंगलापुर तृतीय भएका छन्।
त्यस्तै, जागृति टोल विकास संस्था, टिकुलीगढ आमा समूह र लुम्बिनी एफएम आमा समूह सान्त्वना भएका छन्।प्रभातफेरीमा प्रथम हुने समूहलाई १५ हजार रुपैयाँ, द्वितीय हुनेलाई १० हजार रुपैयाँ, तृतीय हुने दुई समूहलाई जनही पाँच हजार रुपैयाँ तथा सान्त्वना हुने तीन समूहलाई जनही दुई हजार पाँच सय रुपैयाँ नगद पुरस्कार प्रदान गरिएको छ।
प्रभातफेरीमा दुई सयभन्दा बढी संघसंस्थाको सहभागिता रहेको संघका निवर्तमान अध्यक्षसमेत रहनुभएका अनुगमन तथा मूल्यांकन समितिका संयोजक गुणनिधि (माधव) भण्डारीले जानकारी दिनुभयो।





प्रतिकृया दिनुहोस